तू विसरू शकणार नाहीस

तू विसरू शकणार नाहीस 

तू विसरू शकणार नाहीस... 
नदीचा काठ चमचमतं पात्र 
उतरता घाट मोहरती गात्रं 

तू विसरू शकणार नाहीस... 
कलंडता सूर्य लवंडती सांज 
पक्ष्यांच्या माळा किणकिणती झांज 

तू विसरू शकणार नाहीस... 
सोनेरी उन्हं वार्‍याची धून 
पावलांची चाहूल ओळखीची खूण 

तू विसरू शकणार नाहीस... 
दिलेला शब्द ओझरता स्पर्श 
दडलेलं प्रेम ओसंडता हर्ष 

तू विसरू शकणार नाहीस.... 
हातात हात अन तुझं माझं हितगुज 
आंब्याच्या झाडावर पाखरांची कुजबुज 

तू विसरू शकणार नाहीस... 
भिजलेले डोळे विरलेली स्वप्नं 
थिजलेली वाट उरलेले प्रश्न 

तू विसरू शकणार नाहीस 
... अन मीही विसरू शकणार नाही.